Það var komið að níundu jólunum síðan Gummi beit það í sig að fara alltaf á jólunum upp norðausturhrygg Skessuhorns í Skarðsheiðinni.
Margir félagarnir eru orðnir hálf þreyttir á þessum tíðu ferðum og langar að fara eitthvað annað. Það er í góðu lagi að fara annað, en það þarf samt að fara þessa ferð yfir jólin vellur ávallt upp úr Gumma.

Ýmsir hafa komið með í þessar ferðir eins og lesa má um í eldri greinum en síðustu 3 sipti hefur verið flogið niður af fjallinu og síðustu 2 skipti af toppnum.
Að þessu skipti var það Bjartmar sem kom með, en þetta er í annað skipti sem hann kemur með í þessa ferð, en hann kom einnig jólin 2015-16 og flaug þá úr miðri skálinni á leiðinni niður.

Við lögðum nokkuð snemma af stað úr bænum eða um kl. 7:30 sem er óvenju snemmt á þessum árstíma þar sem það er myrkur framundir hádegi. Hinsvegar var veðurspáin þannig að mestar líkur voru á flugi um hádegi svo við vildum eiga sem mestan möguleika á að ná því - einnig sem að Gummi hélt síðan áfram á norðurland eftir ferðina þar sem hann eyddi áramótunum.

Mikið harðfenni var á heiðinni fyrir ofan bæinn Horn sem varð til þess að við vorum mjög fljótir að nálgast fjallið sjálft. Þegar sólin fór að láta vita af sér vorum við komnir vel á veg með höfuðljósin að vopni.
Þar sem við vorum með vængina og vildum vera helst til léttir slepptum við alveg línum og klifurbeltum/tryggingadóti og vorum bara með klifur- og nauðsynlegan öryggisbúnað. Við mælum þó ekki með því nema fyrir þá sem þekkja vel til aðstæðna þarna og eru öryggir í framdrifinu.

Gummi að leggja af stað niður

Við náðum toppnum í hádeginu eins og áætlun sagði til og var þessi fíni vindur (um 5m/s) sem kom frá Skarðsheiðinni sjálfri og því suðlæg átt (ssv). Það þýddi að við urðum að taka á loft í suður og taka svo sveig fram hjá Norðurveggnum áleiðis niður að bíl og þá þurftum við að brenna hæð með speed-bar, sveigum og wing-overs til að fara ekki langt fram hjá honum.
Þetta tókst alveg prýðilega, og vorum við komnir í Bornarnes um kl. 14 og þegar enn var innan við klukkustund frá því að við stóðum á tindi Skessuhorns virtum við hann fyrir okkur frá Borgarnesi.

Myndir